زمان كانت البنت بطالب بحقها فى المجتمع وعايزه تساوى نفسها بالولد زى ما نادت سعاد حسنى لكن اليومين دول الحال اتقلب وبقى العكس تماما الولد هو اللى حقه تاه ومش عارف يخده منين ومن مين؟
واكبر مثال لده هتشوفه فى ميكروباص وهتعرف ازاى المعاملة.
ولــــد :
طبعا وانت بتوقف الميكروباص وما فيش مكان هتلاقى السواق بيقولك شوف لك حته يا بيه اقعد فيها ...يا جماعة حد ياخد الاخ ده جنبه ...او يقوله ادخل يا افندى رابع ورا
بنـــت:
اما لو بنت يا دوب تبص بس بصة استعطاف لاى واحد قاعد يقوم ينط يقعد فى ضهر السواق علشان تقعد
ولـــد:
وانت طالع ممكن تخبط راسك فى الباب هتسمع اللى بيضحك عليك واللى يقولك شوف كنت بتبص فين والكلام ده طبعا.
بنــــــــت:هتلاقى اللى يقولها خير حصلك حاجة من كل الركاب وممكن طبعا تلاقى اللى يقوم بضرب السواق علشان ما وقفش كويس ....
ولـــــد :
وانت بتقفل الباب وطبعا السواق بيقولك اقـفله بالراحة ..العربية عليها أقساط وكمان ممكن يزود العيار ويقولك ..ايه الطور ده ..خلاص يا عم الامور عرفنا انك فندام بس بالراحة على الباب ..ويعينى عليك لو ما تقـفلش هتسمع اللى يقولك ايه يا عم النيتى مش قادر تقفل الباب ياعينى على ده جيل
بنت:
لو بنت وبتقفل بالراحة خالص وممكن الباب ما يتقفلش يقولوا شوفوا الرقة حتى الباب مش هاين عليها تخبطه جامد..ولو قــفلت الباب جامد هيقولوا معلش أكيد متعصبة الله يعينها على اللى هى فيه.
ولــــد:
ممكن يجيلك تيليفون وانت قاعد فى الميكروباص وطلبت من السواق يوطى الصوت شوية علشان تعرف تتكلم هتلاقيه بيبصلك من فوق لتحت ويقولك: عرفنا انك معاك موبايل ..ولو قديم شوية امال لو موبايل عدل كنت عملت ايه ويلف وشه ويعلى الصوت كمان ويفضل يبرطم بقى انت هتشترينا بالجنيه اللى هتدفعه.
بنــــــــت:
لوبنت وبتقول ألوو ( يا سلااام) هيقولوا ايه يا جماعة شوفوا الرقه يا بخت المحظوظ اللى بتكلمه ولو فكر يعترض هترد عليه وتفكره ان القانون بيديها الحق الكامل انك توطى الكاسيت او تطفيه ( قانون ساكسونيا طبعا)
ولد:
خلاص وصلت والحمد لله بعد القهر والتفرقة العنصرية اللى اتعرضت ليها طول الطريق عايز تنزل بتقول للسواق على جنب وطبعا لا يمكن هيسمعك ماهو مشغل الاغانى ومعلى الصوت على أخره ..وهتقوله مرة واتين وعشرة وينزلك بعد الحته اللى انت عايز تنزل عندها بشارعين تلاته ..وطبعا هيقولك ما سمعتكش ما أنت صوتك واطى زى البنات..
بنت:
يا دوب كل اللى هتعمله انها توشوش نفسها على جنب وكأنها بتكلم نفسها هتلاقى بقيت الاربعتاشر نفر اللى قاعدين فى الميكروباص بصوت واحد بيقولوا للسواق على حنب يا اسطى ..انت اطرش..ممكن بعده يوصلها لحد البيت..
رائع يا ابو عمار
ردحذفواجمد حاجه الاربعتاشر نفر اللى هيقولوا ف صوت واحد
على جنب يا اسطى : علشان الابله
انت ممكن تكبر الموضوع شويه بدل ما هو ف المكروباص بس لا تخليه فى كل حاجه
هتلاقى انه فعتلا احنا لازم نعمل قفه احتجاجيه
نطلب فيها بالمساواة